Biðjast afsökunar á skrípalátunum

Björn Valur Gíslason og Lúðvík Geirsson, þingmenn ríkisstjórnarflokkanna, eru þekktir fyrir óvandaða og oft ruddalega framgöngu á Alþingi og liggur við að segja megi að þeir hafi toppað sjálfa sig í bjálfaganginum í gærkvöldi, þegar þeir gengu um þingsalinn með spjald sem á stóð "Málþóf" undir ræðu Illuga Gunnarssonar, sem var að ræða fjárlög ársins 2013.

Önnur umræða um frumvarpið hafði hafist deginum áður og því eins fjarri öllu lagi að kalla umræðurnar málþóf, þó þessir tveir hafi ekki nennt að gegna skyldum sínum í þinginu þetta kvöld, sem reyndar var föstudagskvöld og ekki á hreinu hvort sú staðreynd skýri á einhvern hátt þetta furðulega uppátæki stjórnarþingmannanna.

Þegar mesta ruglið var runnið af þingmönnunum sáu þeir sóma sinn í að biðjast afsökunar á þessum tiltekna fíflagangi, en ættu auðvitað að biðsjast fyrirgefningar á flestu sem þeir hafa aðhafst í þingsölunum allt kjörtímabilið.

Ef til vill skýrist framkoma þessara manna af þeirri staðreynd að þeim var báðum hafnað af kjósendum flokka sinna í prófkjörum og því brjótist heift þeirra og hefnigirni út á þennan hátt, enda síðasti þingvetur beggja.

Vonandi eiga slíkir persónuleikar sem þessir ekki afturkvæmt á þingið eftir kosningarnar í vor.

Þingmenn báðust afsökunar

Athugasemdir

[Sigurður Haraldsson, 1.12.2012 kl. 11:17]

Afar fáir menn á þingi voru ættu nokkurntíma þar að vera!

[Jóhann Elíasson, 1.12.2012 kl. 12:30]

Og ég sem hélt að ég væri búinn að upplifa alla vitleysuna sem gæti komið frá Alþingi - Ég hafði greinilega rangt fyrir mér. Við hverju getur maður búist??

[Þórhallur Kristjánsson, 1.12.2012 kl. 13:22]

Er ekki best að setja upp sandkassa og rólu í alþingisgarðinn. Þá geta þingmenn dundað við það sem hæfir þeim og hentar þeirra þroska.