Jóhanna viðurkennir getuleysið

Á blaðamannafundi eftir ríkisstjórnarfund í dag viðurkenndi Jóhanna Sigurðardóttir algert getuleysi ríkisstjórnarinnar og uppgjöf hennar við að fást við þau verkefni sem við er að glíma í þjóðfélaginu.  Hún sagði þar m.a:  "En ég er sannfærð um það ef við náum samstöðu með stjórnarandstöðunni, náum góðum samráði með hagsmunasamtökunum og aðilum vinnumarkaðarins þá ættum við að geta unnið okkur út úr þessu." 

Hvers vegna nefnir hún ekki góða samstöðu innan og milli stjórnarflokkanna sjálfra, sem hafa haft meirihluta á þingi síðan í febrúar 2009, en reyndar aldrei sýnt neinar hugmyndir eða getu til að leysa úr þeim vanda, sem heimilin í landinu lentu í vegna stökkbreyttra bíla- og húsnæðislána.

Það sýnir einnig sambands- og skilningsleysið á vandamálunum, að stjórnin skuli ekki skilja ákall almennings um aðgerðir fyrr en stæsti og háværasti mótmælafundur Íslandssögunnar nánast barði kröfur um úrbætur inn í höfuð ráðherranna og stuðningsmanna þeirra.  Engin ríkisstjórn hefur nokkru sinni sýnt jafn lítinn skilning á þörfum þeirrar þjóðar, sem hún hefur tekið að sér að vinna fyrir.

Að vísu sást á sjónvarpsútsendingunni frá þingfundinum að ekki tókst að vekja alla ráðherrana almennilega, þar sem Steingrímur J. virtist sofa vært undir ræðum samþingmanna og hávaðanum sem barst inn í þinghúsið frá Austurvelli.  Ráðherrarnir urðu hins vegar áþreifanlega varir við reiðina, sem að ríkisstjórninni beinist, þegar þeir óku heim á leið frá fundinum, því þá hafði skríllinn sem alltaf laðast að svona útifundum sig gróflega í frammi og sýndi eðli sitt með ofbeldisfullum árásum á þingmenn og ráðherra.

Ríkisstjórnin ætlar nú að biðja stjórnarandstöðuna að koma sér til hjálpar, enda algerlega bjargarlaus vegna vanmáttar og ráðaleysis gagnvart vandanum.  Stjórnarandstaðan ætti að taka þennan beiska kaleik frá ríkisstjórninni og gefa henni algert frí frá störfum.

Mikilvægt að ná samstöðu

Athugasemdir

[Kjartan Sigurgeirsson, 5.10.2010 kl. 14:29]

Hún er þá flogin á burt aftur; það leit út fyrir það í seinnifréttum sjónvarps í gærkvöldi að einhver skíma hefði komist inn hjá Jóhönnu um að fólkið í landinu væri sennilega óánægt vegna þess að stjórnin hennar hefur ekki komist nálægt því að valda því starfi sem hún tók að sér fyrir nær 2 árum síðan.  En sá skilningsglampi sem virtist vera á henni er farinn, hún er komin út í óravíddir himinhvolfsins aftur.  Steingrímur hefur e.t.v. þessi áhrif á hana að hún missir allt samband við móður Jörð.

[Aðalsteinn Agnarsson, 5.10.2010 kl. 14:44]

Jóhanna lofaði Þjóðinni frjálsum handfæra veiðum, hún hefur svikið það loforð,

þó 15.000 manneskjur séu án vinnu.

[Ólafur Ingi Hrólfsson, 6.10.2010 kl. 06:40]

Jóhanna sagði í raun og veru -

Ef þið gerið það sem við segjum ættum við að geta náð árangri -

Konan er rugluð - það eru aðgerðir stjórnarinnar sem standa í vegi fyrir árangri -

Kosningar strax -