Árni Páll hlýtur að hætta

Nú virðast einhverjar hrókeringar vera væntanlegar í ríkisstjórninni framundan, fyrst og fremst til að koma Ögmundi Jónassyni inn í ríkisstjórnina áður en þigstörf hefjast að nýju, til þess að reyna að þagga niður í órólegu deildinni innan VG, sem reynst hefur Jóhönnu og Steingrími J. erfiður ljár í þúfu undanfarið.

Þær ótrúlegu fréttir hafa borist af þessum tilfæringum, að Ragna Árnadóttir, mannréttinda- og dómsmálaráðherra, verði látin hætta, en hún hefur sýnt og sannað með störfum sínum að hún er bæði hæfasti ráðherra ríkisstjórnarinnar og sá vinsælasti.  Væntanlega þolir Jóhanna ekki að Ragna skuli bera svona rækilega af í samanburði við hina ráðherrana, ekki síst hana sjálfa, að henni verði fórnað til að vanhæfni hinna ráðherranna verði minna áberandi.

Ekki síður ótrúlegt er, að svo virðist sem Árni Páll Árnason, félagsmálaráðherra, muni halda sæti sínu, en hann hefur ítrekað sýnt valdnýðslu í starfi sínu og ásamt almennri vanhæfni hefur hann margoft verið staðinn að ósannindum vegna starfa sinna og afskipta af ýmsum málum sem honum hafa jafnvel ekkert komið við. 

Kristján Möller, samgönguráðherra, verður líklega látinn fjúka, þó hann sé tiltölulega lítið umdeildur og hafi unnið sín störf aðallega utan sviðsljóssins og hefur ekki svo vitað sé verið staðinn að hreinum lygum, eins og sumir hinna ráðherranna.

Álfheiður Ingadóttir, heilbrigðisráðherra, mun góðu heilli víkja úr sínu embætti, samkvæmt fréttunum og eru það góð tíðindi, enda átti aldrei að hleypa henni í nokkurt einasta ábyrgðarhlutverk innan stjórnsýslunnar eftir framkomu hennar og stjórnun á skemmdarverkarhópum í "búsáhaldabyltingunni".  Jafnvel þó hún hefði ekki tekið að sér að stjórna árásum á Alþingishúsið, hefur hún marg sýnt í gegn um tíðina, að hún er öfgamanneskja, sem ekkert erindi á í áhrifastöður í þjóðfélaginu.

Jón Bjarnason, landbúnaðar- og sjávarútvegsráðherra, virðist vera of stór biti fyrir Jóhönnu og Samfylkinguna, þannig að allar ráðagerðir til að losna við hann úr ríkisstjórninni  virðast ætla að mistakast, þrátt fyrir heiftarlegar árásir Össurar Skarphéðinssonar á Jón undanfarna daga.

Ráðherrarnir sem fyrstir ættu að fjúka, Jóhanna, Steingrímur J. og Össur, munu því miður sitja eitthvað áfram.

Þingflokkar funda í allan dag

Athugasemdir

[Eyjólfur G Svavarsson, 1.9.2010 kl. 18:05]

Á ekki Dómsmálaráðherra að sjá til þess að farið sé að lögum? ´Mér sínist nú Bankamafían fara sínu fram þrátt fyrir dóm Hæstaréttar, og því má hún alveg missa sig.

[Sævar (IP-tala skráð) 1.9.2010 kl. 22:34]

Það er alltaf vandi að meta hver eigi að fara. Ég er hins vegar alveg með á hreinu hver á að koma inn. Ég vil sjá Guðbjart Hannesson sem ráðherra en hann er búinn að sýna mikla yfirvegun og skynsemi í erfiðum málum. Þeir sem þekkja hann bera honum allir gott orð og nær það þvert á flokkslínur. Svoleiðis mann þurfum við inn í ríkisstjórn.