Álfheiður í Kattholti mjálmar

Ámátlegt mjálm barst frá Kattholti Vinstri grænna, þegar Álheiður Ingadóttir hótaði að áminna forstjóra Sjúkratrygginga Íslands, vegna þess að hann vildi undirbúa sig undir fund með henni í samráði við Ríkisendurskoðanda, vegna óskiljanlegrar reglugerðar sem kattafrúin setti um tannlækningar þeirra sem hafa meðfædda tanngalla.

Ekki þarf neitt að koma á óvart, sem frá Álfheiði kemur, enda konan fræg að endemum, utan ráðuneytis sem innan.  Ef einhver ætti að fá áminningu vegna þessa máls, er það Álfheiður, fyrir óvandaða reglugerð og í framhaldi af því arfaslaka stjórnsýslu og dómgreindarskort með hótunarbréfinu um áminninguna.

Eftir að málið komst í hámæli, virðist Álheiður vera búin að sjá að sér, enda hefur hún sent frá sér yfirlýsingu, þar sem hún segist vonast til að málið fái farsælan endi og á þá væntanlega við farsælan endi fyrir sig sjálfa.

Það verður æ skiljanlegra hvers vegna Jóhanna er alveg orðin uppgefin við að reyna að smala Vinstri grænu köttunum, enda hlaupa þeir og stökkva mjálmandi og hvæsandi um allar trissur.

Þeir eru að því leyti öðruvísi en venjulegir heimiliskettir, að þeir virðast aldrei mala af vellíðan.

Vonar að málið fái farsælan endi

Athugasemdir

[Kristinn Karl Brynjarsson, 3.4.2010 kl. 17:19]

Ég  óttast nú mest það sem kemur fram í fyrirsögninni: "Vonar að málið fái farsælan endi".  Mér finnst það minna óþægilega mikið á: "Farsæla lausn", sem Félagi Svavar færði þjóðinni fyrir tæpu ári.

[Ófeigur (IP-tala skráð) 3.4.2010 kl. 17:25]

Þeir eru einnig frábrugðnir venjulegum köttum að því leytinu til að þeir eru ansi hlýðnir þegar kattakonan Jóhanna hótar þeim!

[Finnur Bárðarson, 3.4.2010 kl. 18:18]

Þetta eru einkenni stjórnenda sem ekki valda verkefni sínu, að taka fólk á teppið.

[Ólafur Ingi Hrólfsson, 4.4.2010 kl. 07:45]

Það er sorglegt ef rétt er að Steingrímur gjaldi pólitískra skoðana sinna. Einhver bloggaði að hann væri ekki á sömu skoðun og ráðherrann í pólitík. Ég trúi því hinsvegar ekki fyrr en ég tek á því að ráðherra láti hann fara fyrir að viðhafa góða stjórnsýsluhætti og gera það sem honum bera að gera sem er að gæta hagsmuna almennings. Ég trúi því að ráðherra hafi talið sig vera að gera rétt - forstjórinn efaðist og leitaði til Ríkisendurskoðunar - eðlilega - þar sem sú stofnun sker oftast úr um álitaefni og veitir leiðsögn. Málið varð ekki opinbert fyrr en ráðherra tilkynnti forstjóranum um áminninguna

[Þórarinn Baldursson, 4.4.2010 kl. 16:04]

Það er altt á tjá og tundri í hausnum á þessu liði, það er ekki nokkur vafi!Vonandi fara þau að koma sér frá,völdum.