"Bæjarins bestu" að öðlast heimsfrægð

Minnsti veitingastaður landsins og einn sá elsti er um það bil að öðlast heimsfrægð, en Victoria Haschka, matar- og ferðapistlahöfundur, fer fögrum orðum um þennan íslenska þjóðarrétt og mekka hans, pylsuvagninn við hafnarbakkann í Reykjavík.

Áður höfðu "Bæjarins bestu" öðlast sínar 15 mínútur af frægð í heimspressunni, þegar Bill Clinton þáði þar veitingar í heimsókn sinni hingað til lands um árið, en að vísu þurfti hann að fara í hjartaþræðingu skömmu síðar, en engar sannanir hafa fundist fyrir því að SSpylsan hafi átt þar nokkra sök.

Þessi ágæti pylsuvagn er búinn að þjóna Reykvíkingum í áratugi og pylsurnar þar hafa eitthvert alveg sérstakt "leynibragð", sem engum öðrum tekst að jafna og því á staðurinn sinn trausta viðskiptahóp, eins og biðröðin sem þar er alla jafna sýnir glöggt.

Vonandi mun þetta frábæra pylsuveitingahús fá að standa óhreyft á sínum stað í marga áratugi ennþá og veita gleði, birtu og yl inn í hjörtu bæjarbúa. 

Hátíðlegri en þetta getur umsögn um veitingastað varla orðið. 

Takk fyrir mig.

Íslenska pylsan slær í gegn

Athugasemdir

[Guðni Karl Harðarson, 5.4.2011 kl. 09:09]

Svo sannarlega mætti þetta frábæra pylsuveitingahús standa óhreift. Vonum að fullt af útlendingum lesi greinina og röðin í vagninn lengist enn verulega!

Það er ýmislegt sem við íslendingar eigum sem við getum verið stoltir af. Tökum tildæmis Hestinn okkar.

[Hrafn Arnarson (IP-tala skráð) 5.4.2011 kl. 09:36]

Umfjöllunin á matarvef Huffington Post er mjög skemmtileg. En hún er sönn og rétt lýsing á matarmenningu að vísu ekki allri! Margar þjóðir eru þekktar fyrir mikla fjölbreyttni í pylsugerð. nefna má þjóðverja Gleymum því ekki að skyndibitinn er mikilvægur í ferðaþjónustu.

[Guðni Karl Harðarson, 5.4.2011 kl. 09:44]

Sammála þér Hrafn ég las greinina alla og hafði gaman af

[Axel Jóhann Axelsson, 5.4.2011 kl. 09:56]

Það er auðvitað rétt, að margar þjóðir eiga ríka hefð fyrir alls kyns pylsum og því er skemmtilegt að þessi einfaldi íslenski pylsuréttur skuli fá svona jákvæða umfjöllun frá erlendum matgæðingi, þó við Íslendingar höfum kunnað að meta "Bæjarins bestu" áratugum saman.  Reyndar er pylsuvagninn afar vinsætt á meðal erlendra ferðamanna, eftir því sem manni hefur sýnst, þegar maður kemur þarna við.

"Bæjarins bestu" freista manns oft, þegar maður á leið framhjá, þó hungur sverfi ekkert að.  Þá fær maður sér bara eina, ánægjunnar vegna.

[Eyþór Örn Óskarsson, 5.4.2011 kl. 11:22]

ég er alveg sammála þeim sem skrifa hér á undan, að Bæjarins Bestu hafa um langa hríð borið höfuð og herðar yfir pylsuvagnamenningu okkar íslendinga, en kanski má segja "að hverjum finnist sinn fugl fagur" og þó ég njóti þess að fá mér eina og jafnvel tvær ef ég er hvort eð er að stússast í miðbæ Reykjavíkur - þá get ég alveg setið á mér ef ég er á heimleið - við höfum nefnilega einn frábærann pylsuvagn við brúarsporðinn á Selfossi............

[Eyjólfur G Svavarsson, 5.4.2011 kl. 12:34]

Pylsuvagninn,Bæjarins bestu er heilagur. Ég hef verslað þar síðan ég var 9 ára svo það eru orðin 61 ár. alltaf með bestu pylsurnar!