Verða skattalagabrotin það eina sem sannast?

Rannsóknarteymi frá skattrannsóknarstjóra hefur unnið að því í marga mánuði, að fara yfir alla gjörninga gömlu bankanna, með tilliti til þess hvort tekjum hafi verið skotið undan skatti, vegna margskonar starfsemi bankanna sjálfra og ekki síður vegna ýmissa gjörninga þeirra fyrir viðskiptavini sína.

Sérstakur saksóknari er að rannsaka tugi mála, sem snerta bankana, eigendur þeirra og útrásartapara, sem í mörgum tilfellum eru sömu aðilarnir.  Í þeim rannsóknum munu milli 50-70 manns hafa stöðu sakbornings, en ekkert er vitað hvenær þessum rannsóknum lýkur, eða hvort hægt verður að stefna fólki fyrir dómstóla á grundvelli þeirra. 

Baugsmálið fyrsta sýndi svart á hvítu hvernig hægt er að tefja mál og toga fyrir dómstólum og í því máli náðist ekki sakfelling, nema í nokkrum smærri atriðum ákærunnar, vegna snilldar verjendanna við hártogun ákæranna.

Á bannárunum í Bandaríkjunum var Al Capone helsti glæpaforingi þar í landi, en þrátt fyrir mikinn eltingaleik yfirvalda við hann, náðist aldrei að fá hann dæmdan fyrir neina af glæpum sínum.  Að endingu tókst skattayfirvöldum að hanka hann á skattsvikum og endaði hann ævi sína innan fangelsismúra vegna þeirra.

Ef til vill verður það sama uppi á teningnum hérlendis, að það eina sem hægt verði að sakfella banka- og útrásartaparana fyrir, verði skattsvik. 

Möguleg skattalagabrot bankanna rannsökuð

Athugasemdir

[Guðmundur Ásgeirsson, 25.2.2010 kl. 13:31]

Þá er kannski eins gott að skattalöggjöfin er nokkuð sterk, og mörg úrræði þar til sekta og annara refsinga. Einnig ber að skoða vel möguleg fjársvik, en lög um þau eru einnig nokkuð sterkur gunnur til að byggja á. Hvað varðar lög um verðbréfa- og bankaviðskipti, þá eru fjármálaverkfræðingarnir þar hinsvegar ljósárum á undan löggjöfinni.

[Axel Jóhann Axelsson, 25.2.2010 kl. 13:54]

Þeir, sem eru staðráðnir í að fara á svig við lög, eru alltaf skrefi á undan löggjafanum, eftirlitsaðilum og lögreglunni.