Trúverðuleiki fréttastofu Stöðvar 2 að engu orðinn

Fréttastofa Stöðvar 2 flutti frétt í júlí 2009 af því að fjórir nafngreindir banka- og útrásarruglarar hefðu flutt hundruð milljóna króna út úr Straumi-Burðarási og inn á sína einkareikninga í skatta- og bankaparadísum erlendis.  Þetta áttu að hafa verið Björgólfsfeðgar, Karl Wernersson og Magnús Þorsteinsson og þrátt fyrir ákafa neitun þeirra, lýsti fréttastofa Stöðvar því yfir að hún stæði við fréttina, enda hefði hún fyrir henni traustar heimildir.

Nú, tæpum tíu mánuðum síðar, dregur fréttastofan fréttina til baka og viðurkennir að hún hafi aldrei haft nein gögn til stuðnings fréttinni og aðeins byggt hana á frásögn eins heimildarmanns, sem engin gögn hafði heldur í sínum höndum um málið.

Athygli vekur að allir þessir umræddu menn tilheyrðu annarri klíku en á og rekur Stöð 2 og því vaknar sú spurning hvort heimildarmaðurinn tilheyri eigendahópi stöðvarinnar og hafi viljandi verið að beina athygli almennings í aðrar áttir, en að t.d. aðaleiganda 365 miðla.

Hvað sem því líður er þetta mál gífurlegur álitshnekkir fyrir fréttastofu Stöðvar 2 og trúverðugleiki hennar að engu orðinn.  Björgólfur Thór stefndi stöðinni fyrir ærumeiðingar og þegar sú kæra kom fram, ýtrekaði fréttasofan að hún stæði við fréttina, enda væri hún rétt og heimildir öruggar.

Fréttamenn hamra stöðugt á stjórnmálamönnum hvort þeir ætli ekki að "axla ábyrgð", sem í þeirra munni þýðir á mannamáli að fréttamaðurinn sé að gefa í skyn, að viðkomandi viðmælandi eigi að segja af sér og yfirgefa sviðsljósið.

Hver mun axla ábyrgð vegna þessarar fréttafölsunar?

Fréttastofa Stöðvar 2 dregur frétt til baka

Athugasemdir

[Árni Gunnarsson, 11.5.2010 kl. 09:56]

Svona vill fara þegar gefin eru út veiðileyfi á tilgreinda einstaklinga. Það er full ástæða að halda þessu til haga og minna á skyldur fréttamanna.

Samúð mín í garð þessara manna sem þarna voru ásakaðir ranglega? skerðist þó að mun þegar mér verður hugsað til þess hvernig umræddir menn tóku sér veiðleyfi á þjóð sína og hversu ógætilega þeir fóru með það.

[Axel Jóhann Axelsson, 11.5.2010 kl. 10:22]

Það er alveg rétt, Árni, að samúðin með "fórnarlömbunum" í þessu máli er afar takmörkuð, en það breytir ekki því, að þetta voru mjög alvarlegar ásakanir á nafgreinda menn og þrátt fyrir andrúmsloftið í þjóðfélaginu og litla ást á þessum görkum, þá verður að fara að með gát, þegar svona stórfréttir eru fluttar.

Í svona tilfelli ætti hreinlega að gefa upp nafn "heimildarmannsins" sem laug fréttamanninn fullan, án nokkurra heimilda.  Svo hélt maður að fréttastofur birtu ekki stórfréttir nema að geta staðfrest þær, a.m.k. úr tveim ólíkum áttum.  Þess vegna er þetta mikil afhjúpun um óvönduð vinnubrögð á fréttastofu Stöðvar 2 og vekur upp spurningar gagnvart öðrum fréttamiðlum.

Þannig er þetta ekki bara hneisa fyrir Stöð 2, heldur vekur tortryggni gagnvart fréttamönnum almennt.