(Enn einn) skrýtinn ársreikningur

Olíufélagið N1 hefur birt ársreikning sinn fyrir árið 2010 og þar kemur fram að bókfært tap félagsins á árinu nam tæpum tólf milljörðum króna, sem verður að teljast með ólíkindum, þar sem rekstrartekjur voru um fjörutíuogsex milljarðar króna.  Tapið var því hátt í 25% af rekstrartekjum og verður það að teljast með nokkuð miklum ólíkindum.

Tvær upphæðir á rekstrarreikningi félagsins vekja sérstaka athygli, en það er að fjármagnskostnaður, umfram fjármagnstekjur, nam um 8,6 milljörðum króna og hafði hækkað um sjö milljarða á milli áranna 2009 og 2010.  Fjármagnskostnaðurinn árið 2010 var 5,4 milljörðum krónum hærri en á hrunárinu mikla, 2008, þegar gegnið hrundi og gengistap fyrirtækja var gríðarlegt.

Hin upphæðin sem athygli vekur er niðurfærsla viðskiptavildar að upphæð 4,5 milljarðar króna, en hún hlýtur að skýrast af því að verið sé að afskrifa kaupverð einhverra fyrirtækja á undanförnum árum, sem keypt hafa verið á allt of háu verði, sem reyndar var venja, frekar en hitt, á árunum fyrir hrun.

Til skýringar fylgja hér með nokkrar tölur úr ársreikningi N1: 

                                               2010                  2009                    2008                       2007

Rekstrarhagnaður              1.079.460           1.974.879             2.092.265              1.317.926

Fjármunat.(-gjöld)       (8.599.230)      ( 1.599.817)      ( 3.366.546)           ( 355.351)

Hagn.(tap) f.skatta           (7.519.770)              375.062          ( 1.274.281)                962.575

Reiknaðir skattar                   226.504              ( 97.656)               163.314               ( 101.682)

Niðurf.viðskiptav.         (4.531.000)

Hagn.(tap) ársins            (11.824.266)              277.406          ( 1.110.967)                860.893

 

Fréttamenn hljóta að leita nánari skýringa á þessari ótrúlegu hækkun fjármagnskostnaðar á milli áranna 2009 og 2010, því jafnvel þó allar skuldir félagsins hefðu verið á dráttarvöxtum allt árið, dugar það varla til að skýra þennan gífurlega fjármagnskostnað.

Ekki síður væri forvitnilegt að vita hvaða viðskiptavild hafi verið niðurfærð á árinu og hvað fyrirtækið reiknar með að þurfa að niðurfæra miklu meira af slíku á næstu árum. 

Ekkert í ársreikningi N1 bendir til þess að stjórnendur félagsins standi undir þeim háu launum, sem þeir hafa þegið fyrir að mæta í vinnuna. 

N1 tapaði tæpum 12 milljörðum

Athugasemdir

[Kalli (IP-tala skráð) 12.8.2011 kl. 08:12]

Hvernig stendur á því að N1 er með 46 milljarða í rekstrartekjur á meðan Skeljungur og Olís eru með "einungis" 6 milljarða?

Hvaðan í ósköpunum eru þessar 40 milljarða viðbótartekjurað koma? Er ekki N1 samansett úr olíusölu og gamla Bílanaust?