Tilgangslaus yfirheyrsla yfir Sigurði Einarssyni?

Sigurður Einarsson er kominn heim í heiðardalinn og mun heiðra Sérstakan saksóknara með nærveru sinni á skrifstofu hans í dag og spjalla þar um daginn og veginn og þó aðallega veðrið.  Sigurður telur þetta vera heppilegan tíma til þessa spjalls, enda búinn að hafa þrjá mánuði til að semja handritið, sem hann mun styðjast við í samræðum sínum við saksóknarann.

Félagar Sigurðar, sem sátu í varðhaldi og sættu yfirheyrslum fyrir þrem mánuðum síðan, eru auðvitað löngu búnir að gefa foringja sínum nákvæma skýrslu um allar þær spurningar sem fyrir þá voru lagðar í yfirheyrslunum, þannig að Sigurður er vel undirbúinn eftir þriggja mánaða yfirlegu yfir því, sem kom fram um vitneskju embættisins um gerðir þeirra félaga.  Ekki er heldur að efa, að Sigurður sé búinn að vera í þriggja mánaða þjálfunarbúðum með lögmönnum sínum, til þess að æfa svör við öllum hugsanlegum spurningum sem hugsast getur að fyrir hann verði lagðar og því ekki nokkur hætta á að hann tali af sér, eða bæti nokkru við það sem þegar liggur fyrir um þátttöku hans í stærsta bankaráni sögunnar, sem framið hefur verið innanfrá, eins og gerðir þeirra félaga hafa verið kallaðar.

Sigurður neitaði að mæta til viðræðna við saksóknarann vegna ótta síns við að verða hnepptur í gæsluvarðhald, en stórhöfðingjar láta nú ekki bjóða sér slíkar trakteringar, enda ekki leyfilegt að hafa með sér silkisængurfötin í svoleiðis gistingu, þannig að hann lét ekki sjá sig á landinu, fyrr en hann hafði fengið tryggingu fyrir því, að móttökunefndin í Keflavík væri ekki skipuð lögreglumönnum.

Á Keflavíkurflugvelli tók yfirþjálfari Sigurðar á móti honum, þ.e. Gestur Jónsson, lögmaður, og fór með hann rakleiðis í lokarennsli handritsæfinganna og því er Sigurður nú meira en klár í slaginn við þann sérstaka og mun auðveldlega renna í gegnum rulluna um að allt hafi þetta nú verið Davíð Oddsyni og öðrum álíka illmennum að kenna og hann sjálfur sé einungis fórnarlamb í málinu og eigi í raun rétt á stórkostlegum skaðabótum vegna meðferðarinnar, sem hann hefur mátt þola.

Varðhald í viku mun engu breyta um framburð Sigurðar, til þess er handritið of vel samið og einnig búið að fara í gegnum andlegan undirbúning undir nokkurra daga innilokun án silkináttfata og -rúmfata. 

Úr því sem komið var, mátti spara Sigurði farseðilinn til landsins a.m.k. þangað til dómur fellur og langtímagistingin fyrir austan tekur við.

Sigurður mættur í yfirheyrslu

Athugasemdir

[Ólafur Ingi Hrólfsson, 19.8.2010 kl. 11:59]

Sumir eru jafnari en aðrir - enda sést það á trýni sigurðar.

[Árni Gunnarsson, 19.8.2010 kl. 13:12]

Þetta Sigurðamál er allt í þeim óbeytta ferli sem mótaður var af ríkisstjórn Geir H. og Ingibjargar S. Þetta kölluðu ráðherrar þeirrar ríkisstjórnar "að velta við hverjum steini."

Ríkisstjórn Jóhönnu og Steingríms var svo hrifin af þessum steinaveltum að hún ákvað að halda óbreyttum vinnubrögðum.

Mesta áherslan var lögð á að koma lykilstarfsmönnum hrundu bankanna inn í skilanefndir og tryggja þeim stóran hluta fjárlaganna í laun.

Mér finnst það afrek að fá Sigurð Einarsson í viðtal hjá sérsökum áður en hann gleymir því að hann hafi unnið í banka á Íslandi.

Húrra! Ólafur sérstakur!

[Axel Jóhann Axelsson, 19.8.2010 kl. 13:15]

Ekki vissi ég til að ráðherrar, eða aðrir stjórnmálamenn væru í vinnu hjá sérstökum, eða öfugt.  Ef svo er, þá er það auðvitað mjög sérstakt.

[Árni Gunnarsson, 19.8.2010 kl. 14:19]

Sérstakur er í vinnu hjá stjórnvöldum samkvæmt mínum skilningi.

[Axel Jóhann Axelsson, 19.8.2010 kl. 14:34]

Embættið er sjálfstætt og á ekki að taka við beinum fyrirmælum frá stjórnvöldum, samkvæmt mínum skilningi.  Því rannsakar sérstakur það sem talið er að hafi verið saknæmt í rekstri bankanna o.fl. fyrir hrun.  Sem betur fer eiga hvorki ráðherrar eða aðrir stjórnmálamenn aðkomu að þeim rannsóknum, þeir hafa meira en nóg með sitt, sýnist manni.

[Óskar G (IP-tala skráð) 19.8.2010 kl. 14:54]

Pukur Sigurðar og "þess sérstaka" er duló með meiru.

Þetta virðist vera kurteysisfundur... ætli "sá sérstaki" sé að biðjast afsökunar fyrir hönd WC og Samspillingar að hafa látið lýsa eftir honum hjá Interpol?

Það ætti að skrúbba Sigurð með lút og skilja hann eftir í gapastokki á Arnarhóli yfir helgina.

[Jose Mourinho (o especial) (IP-tala skráð) 19.8.2010 kl. 15:41]

Não estou entendendo.

[Axel Jóhann Axelsson, 19.8.2010 kl. 16:04]

O que voce nao estende, nome secreto?

[Árni Gunnarsson, 19.8.2010 kl. 18:18]

Embætti sérstaks saksóknara var stofnað að tilhlutan dómsmálaráðherra/ráðuneytis samkvæmt mínu minni.

Það er líka mín skoðun að enda þótt Hæstiréttur sé sjálfstæður dómstóll þá starfi hann í tengslum við dómsmálaráðuneytið.

Samkvæmt mínum skilningi er dómsmálaráðuneytið hluti af stjórnsýslunni.

Samkvæmt mínum skilningi er orðhengilsháttur mörgum manninum óþarflega oft tiltækur og auðveld flóttaleið frá aðalatriðum.

[Axel Jóhann Axelsson, 19.8.2010 kl. 18:42]

Í samræmi við þrískiptingu valdsins starfar Hæstiréttur ekki í neinum tengslum við Dómsmálaráðuneytið og er ekki undir stjórn þess.

Það er nákvæmlega enginn orðhengilsháttur að halda því fram.  Þessi skipan er í samræmi við stjórnarskrána og samkvæmt henni hafa stjórnmálamenn og ráðuneyti ekkert yfir dómstólunum að segja.

[Árni Gunnarsson, 19.8.2010 kl. 19:19]

Allir dómstólar eru sjálfstæðir. Dómsmálaráðherra skipar dómara í Hæstarétt. Hæstiréttur er æðsta stig dómsýslunnar.

Dómsýsla er hluti af stjórnkerfi Íslands og í beinum tengslum við dómsmálaráðuneyti.