Ekki vel rökstutt álit Talsmanns neytenda

Talsmaður neytenda segir hæpið að niðurfellig hluta af höfðustól skulda sé skattskyldur, þrátt fyrir að í 7. gr. tekjuskattslaga segi að skattleggja skuli „sérhverjar aðrar tekjur eða ígildi tekna sem eigi eru sérstaklega undanskildar í lögum þessum eða sérlögum.“  Skattayfirvöld hafa hingað til verið afar hörð á því að skattleggja allt, sem hægt er að skattleggja og dálítið er hæpið að halda því fram að niðurfelling skulda myndi ekki aukna eign hjá þeim, sem slíkrar fyrirgreiðslu nytu.

Talsmaðurinn rökstyður mál sitt, að því er virðist, aðallega með því að við niðurfellingu skulda sé ekki um að ræða "ívilnun eða „eignaauka - heldur staðfestingu á rétti neytenda".  Þessi "réttur neytenda" hefur hvergi verið staðfestur, eða viðurkenndur í lögum og því vafasamt af talsmanninum, að vekja falskar vonir hjá umbjóðendum sínum, án frekari rökstuðnings.

Fjölmargir bíða og hafa beðið lengi eftir því að vera skornir niður úr skuldasnörunni, sem þeir smeygðu um háls sér á tímum "lánærisins", ekki síst þeir sem voru svo óforsjálir að taka há lán í erlendum gjaldmiðlum, sem hækkuðu mikið í lok "gróðærisins".

Þangað til Talsmaður neytenda bendir á traustari rök fyrir máli sínu, verður að hafa mikla fyrirvara á þessu útspili hans.

Niðurfærsla skulda ekki skattskyld

Athugasemdir

[Stebbi (IP-tala skráð) 24.3.2010 kl. 17:12]

Fréttin endar á þessum orðum:

"Auk þess liggja fyrir tveir eldri úrskurðir ríkisskattanefndar sem virðast styðja þá niðurstöðu að niðurfærsla skulda teljist ekki skattskyldar tekjur"

Hann virðist eitthvað hafa skoðað málið út frá skattamálunm fyrst hann veit um tvö mál sér til stuðnings.

[G. Valdimar Valdemarsson, 24.3.2010 kl. 17:20]

Er ekki nóg að vísa í gildandi lög um nauðarsamninga, hvernig tekið hefur verið á sambærilegum málum hingað til og tvo eldri úrskurði ríkisskattanefndar.  Hvað fleiri rök ert þú að biðja um ?

[Axel Jóhann Axelsson, 24.3.2010 kl. 17:28]

Ég hef ekki tekið neina afstöðu í þessu máli, ég bað um frekari rökstuðning, t.d. hvaða úrskurði ríkisskattanefndar þetta væru til þess að sjá hvort þeir ættu við nákvæmlega svona mál.  Þar sem mörg ár eru síðan Ríkisskattanefnd var lögð niður og Yfirskattanefnd tók við hlutverki hennar, þá bendir þessi tilvísun væntanlega til einhverra gamalla mála og því þarf að sjá hvort þeir úrskurðir eigi við núna.

Skattmann sjálfur, Indriði H., hefur það mikla þekkingu á skattalögum og er mikill áhugamaður um að skattleggja allt sem hægt er að skattleggja og því var ég að vara við að fólk færi að gera sér of miklar væntingar um niðurstöðu málsins.

Einnig þess vegna var ég að velta því upp, í hvað talsmaðurinn væri að vitna, þegar hann talar um "rétt neytenda" varðandi skuldaniðurfellingar.

[Ólinn (IP-tala skráð) 24.3.2010 kl. 17:30]

Skattmanninn og ICEsave-snillingurinn Indriði skattlagði nú á sínum tíma föt bankastarfsmanna sem fríðindi...

Epísk snilld....

[Hallur Magnússon (IP-tala skráð) 24.3.2010 kl. 17:46]

Það er Indriði H. sem er vafasamur í þessu - sem flestu öðru. Ekki Talsmaðurinn sem er að sinna starfi sínu.

[G. Valdimar Valdemarsson, 24.3.2010 kl. 18:28]

Axel Gísli færir ágæt rök fyrir máli sýnu á grein á heimasíðu Talsmanns neytenda www.tn.is er ekki rétt að þú lesir hana bara áður en þú tjáir þig um málið ?

[Axel Jóhann Axelsson, 24.3.2010 kl. 18:42]

Ég hef einmitt lesið greinina og er ekki enn sannfærður um hvor hefur rétt fyrir sér, Talsmaður neytenda eða Skattmann, enda segir talsmaðurinn í niðurstöðum sínum:  "Ég tel m.ö.o. líklegt að ekki sé lagastoð fyrir því að skattleggja niðurfærslu eða „afskriftir“ skulda neytenda sem stjórnvöld og fjármálastofnanir hafa ýmist þegar ákveðið eða áforma."

Talsmaður neytenda gefur út sitt álit á málum, en kveður ekki upp dóma, enda segist hann telja líklegt að ekki sé lagastoð fyrir skattlagningunni, en Skattmann segir að verið sé að milda skattlagningu, sem sé samkvæmt skattalögum.

Þetta er sem sagt efni í enn eitt deilumálið varðandi skuldavanda heimilanna og því rétt að endurtaka viðvörunarorð um að fólk geri sér ekki of miklar væntingar, enda ekki farið að sjást til neinna "lausna" í þessum efnum.