Styrkir fyrirtækja

Fyrir árið 2007 byggðist aðalfjáröflun stjórnmálaflokkanna á styrkjum frá fyrirtækjum landsins, sem í raun héldu lífi í flokkunum með fjárframlögum sínum.  Allir flokkarnir reiddu sig á þessi framlög til starfsemi sinnar og engin lög takmörkuðu upphæðir einstakra styrkja.  Sjálfstæðisflokkurinn er eini flokkurinn, enn sem komið er, sem opinberað hefur fyrirtækjastyrki ársins 2006.  Nú er beðið eftir að hinir flokkarnir geri slíkt hið sama.

Þegar flokkarnir sáu, að þetta gat ekki gengið svona til lengdar voru sett lög sem takmörkuðu upphæð styrks frá einstökum aðilum við 300.000 krónur, en settu sjálfa sig á stórhækkuð fjárframlög frá ríkinu í staðinn.  Um þetta voru allir flokkarnir hjartanlega sammála, enda auðvitað miklu tryggara að fá föst framlög frá skattgreiðendum, en þurfa að standa í betli út um borg og bí.´

Flokkarnir hafa sjálfsagt allir í aðdraganda lagabreytinganna notað árið 2006 til þess að stoppa í götin á flokkssjóðunum til að rétta af halla undangenginna kosningaára.  Í því ljósi er vægast sagt undarlegur þessi uppblástur um fjárhag Sjálfstæðisflokksins.  Hann mun vafalaust lægja þegar hinir flokkarnir birta framlög til sín á árinu 2006.

Eftir stendur, að það er dómgreindarleysi hjá heiðarlegum stjórnmálaflokkum, að taka við framlögum frá óprúttnum fjármálamönnum.  Eina afsökunin er að á þessum árum voru fjármála- og útrásarvíkinar í miklu uppáhaldi hjá almenningi og virtir og dáðir sem hinir einu sönnu bjargvættir þjóðarinnar, sem dansaði með þeim í miklum eyðsludansi. 

Þessi styrkjaumræða er stormur í vatnsglasi í aðdraganda kosninga.

Landsbankinn veitti 2 styrki

Athugasemdir

[Bobbi (IP-tala skráð) 10.4.2009 kl. 10:39]

Stormur í vatnsglasi í aðdraganda kosninga. Já já, gleymum bara spillingunni, látum eins og ekkert sé og kjósum SjálfstæðisFLokkinn!

[Gústaf (IP-tala skráð) 10.4.2009 kl. 10:45]

Hvaða endemis bull er þetta? Ert þú virkilega að reyna að réttlæta mútugreiðslur til valdahafa til tryggingar á að fá að kaupa hluti í Hitaveitu Suðurnesja?

Er það ekki augljóst að Landsbankinn, Glitnir og FL Group settu inn 60 miljónir til að komast fyrstir að köttlunum?

Af hverju er ekki hafin lögreglurannsókn á þessu máli? Má ég múta ráðherrum til þess að fá verkefni eða forkaupsrétt? Geir segir sjálfur að hann einn beri ábyrgð á viðtöku þessara fjármuna og á þessum tíma var hann jú ráðherra.

[Axel Jóhann Axelsson, 10.4.2009 kl. 13:44]

Alveg er það dæmalaus málflutningur að ásaka pólitíska andstæðinga endalaust um spillingu og glæpaverk.  Það er ekkert óeðlilegt við það að stærsti stjórnmálaflokkur þjóðarinnar þurfi að afla meira fjár til sinnar starfsemi en minni flokkarnir.

Nú, þegar hinir flokkarnir opna sín bókhöld fyrir árið 2006, kemur í ljós að t.d. Smáflokkafylkingin fékk 45 milljónir í styrki frá fyrirtækjum á árinu 2006, en aðeins 9 milljónir árið 2005 og 11 milljónir árið 2007. 

Hver, og hversvegna var verið að múta Smáflokkafylkingunni árið 2006?