Þeim fjölgar sem gefa EKKI kost á sér í forsetaframboð

Fimm eða sex manns hafa tilkynnt um framboð sitt til embættis forseta og er kosningabarátta þeirra kominn á fullan skrið, þó nokkur mismunur sé á því hverjum þeirra er hampað í fjölmiðlum og hverjum ekki.

Einhverjir hafa séð ástæðu til að senda frá sér yfirlýsingar um að þeir hyggist EKKI taka þátt í þessum forsetaslag, a.m.k. ekki að sinni eins og það er oftast orðað, án þess að nokkur hafi í raun reiknað með að þessir einstaklingar ættu nokkurt erindi á Bessastaði.

Enn er eitthvað rúmlega þrjúhundruðþúsund manns sem ekki hafa sent frá sér neinar yfirlýsingar um hvort af framboði verður eða ekki og hljóta fjölmiðlar að fyllast af bréfaskriftum alls þess fólks á næstu dögum, þegar það hefur ákveðið sig endanlega um þátttöku í þessu æsispennandi forsetakjöri.

Spennan magnast dag frá degi, þó allir viti nú þegar hver niðurstaðan verður.

Elín Hirst gefur ekki kost á sér

Athugasemdir

[Jón Steinar Ragnarsson, 9.4.2012 kl. 19:37]

Ég hef einnig ákveðið að fara ekki fram að þessu sinni þrátt fyrir ítrekaðar vangaveltur.  Býst við að það sama gildi um þig Axel. Við getum kannski sparað okkur frímerki með að senda þá tilkynningu út í sameiningu.

[Axel Jóhann Hallgrímsson, 9.4.2012 kl. 20:01]

Ég hef líka, eftir langa íhugun, ákveðið að gefa ekki kost á mér, þrátt fyrir að ég hafi lagt hart að sjálfum mér, hvar ég hef beitt bæði áskorunum í fjöldavís sem og öðrum þrýstingi.

[Axel Jóhann Axelsson, 9.4.2012 kl. 20:13]

Af þessu tilefni er líklega rétt að upplýsa, að eftir afar skamma íhugun og með hliðsjón af öllum þeim áskorunum sem EKKI hafa borist, þá hef ég ákveðið að gefa ekki kost á mér í forsetaframboð að sinni.

Þó líklegt sé, að afar fáir hafi beðið eftir þessari yfirlýsingu, sé ég mig nú samt knúinn til að koma henni á framfæri tímanlega til þess að gefa öðrum góðan tíma til að íhuga sína afstöðu til framboðs nú, eða síðar.

[Þórður (IP-tala skráð) 9.4.2012 kl. 21:29]

Góður Axel!

[Elle_, 9.4.2012 kl. 22:00]

Ha, ha. En verð að fara núna að lesa yfir 300 þúsund pósta.

[Sigurður Kristján Hjaltested (IP-tala skráð) 10.4.2012 kl. 17:48]

Og ég sem var að spá.....