Stjórnin getur hvorki lifað né dáið

Ljóst er orðið að ríkisstjórnin er varla með lífsmarki lengur en virðist alls ekki geta dáið því ráðherrarnir berjast ennþá um á hæl og hnakka í tilraun til að halda stólunum örlítið lengur.

Hvert vandræðamálið rekur annað þessa dagana, eins og reyndar hefur verið frá myndun stjórnar Jóhönnu Sigurðardóttur, og er nú svo komið að illskan og jafnvel hatur milli stjórnarflokkanna er komið á svo alvarlegt stig að nánast útilokað er að takist að treina líf stjórnarinnar mikið lengur, enda væri þjóðinni mestur greiði gerður með því að hún hrökklaðist frá völdum undir eins.

Í Kastljósi kvöldsins kom skýrt fram hjá Birni Vali Gíslasyni, gjallarhorni Steingríms J., að allur barningur stjórnarflokkanna nú um stundir snerist um að finna leiðir til að framlengja líftóru stjórnarinnar um nokkra daga, a.m.k. nógu marga til að koma fjárlögum næsta árs í gegn um þingið.

Björn Valur sagði vandræðaganginn ekki snúast eingöngu um framtíð Jóns Bjarnasonar í ráðherraembætti, heldur um að finna leiðir til að stjórnin gæti hökt áfram eftir að Jón yrði hrakinn úr stjórninni.

Takist Steingrími J. að sannfæra Ögmund og Guðfríði Lilju um að halda áfram stuðningi sínum við stjórnarhörmungina gegn loforði um stöðvun allrar fjárfestingar í landinu, a.m.k. erlendrar, mun Samfylkingin líklega geta tryggt sér stuðning Guðmundar Steingrímssonar, þannig að stjórnin hangi áfram á eins manns meirihluta á þinginu. Þannig mætti hugsanlega ná því að klára fjárlögin, en ósennilega nokkuð annað.

Undirbúningur útfarar ríkisstjórnarinnar er í fullum gangi.

Hefði mátt fara öðruvísi að

Athugasemdir

[Haukur Kristinsson (IP-tala skráð) 29.11.2011 kl. 08:42]

Auðvitað er númer eitt, tvö og þrjú að “framlengja líftóru stjórnarinnar”, eins og þú orðar það Axel, þar til kjörtímabili líkur. Vill einhver Hrunverjana, kúlulána- þjófana aftur til valda? Engin, ekki einu sinni Axel Jóhann Axelsson.

En nú verður að að stokka upp í stjórninni. Burt með jólasveininn Jón Bjarnason, og það strax. Það er mikil eftirspurn eftir slíka mönnum þessa dagana í í Dimmuborgum í Mývatnssveit.

Tvær manneskjur vil ég sjá í nýrri stjórn; Björn Val Gíslason og Valgerði Bjarnadóttur.  

[Axel Jóhann Axelsson, 29.11.2011 kl. 12:08]

Mikið lifandis skelfing er þessi frasi um "hrunstjórnina" orðinn þreyttur og lúinn. Varla telur þú að íslenska "hrunstjórnin" sé ábyrg fyrir hruninu á fjármálamörkuðum í Bandaríkjunum og að ekki sé nú talað um hörmungarnar sem ganga yfir Evrópu þessi misserin og þá ekki síst evrulöndin.

Brandarinn um þær manneskjur sem þú vilt sjá í nýrri stjórn er hins vegar bara nokkuð fyndinn.

[Haukur Kristinsson (IP-tala skráð) 29.11.2011 kl. 12:27]

Það var Íslendingum lán í óláni að fjármálakreppa varð í Evrópu og US. Ef þessi glórulausi bankarekstur hér á klakanum hefði varað lengur, værum við í verri málum en vinir mínir Grikkir. Líklega enn fleri "Icesave" reikningar. Íslensku bankarnir voru orðnir glæpastofnanir, "money laundering" og falsað bókhald. Og í seðlabankanum sat afglapi, sem vissi ekkert í sinn haus. Og hrunstjórnin undir forystu Geirs Gungu og Sollu, bara eitt sorglegt djók. 

[Axel Jóhann Axelsson, 29.11.2011 kl. 18:07]

Bankarnir voru einkafyrirtæki og þar réðu eigendur ferðinni en ekki stjórnmálamenn. Að bendla stjórnmálamenn og ráðherra við þann rekstur er ekki gert nema af illvilja, pólitísku ofstæki eða einhverju þaðan af verra.