Fjórði vetur frá hruni og ástandið lagast ekki

Nú er fjórði vetur eftir hrun að ganga í garð og enn hefur lítið gerst til að koma þjóðfélaginu upp úr kreppunni sem fylgdi í kjölfar bankahrunsins.

Enn er atvinnuleysi í hæstu hæðum og enn bætist á atvinnuleysisskrána með hópuppsögnum og búist er við að þeim linni ekki í bráð. Þrátt fyrir fagurgala stjórnarliða um afrek ríkisstjórnarinnar í öllum málaflokkum finnur enginn fyrir þeim afrekalista á eigin skinni, enda verðbólga mikil og kaupmáttur verður minni og minni eftir því sem stjórnartíminn lengist.

Fólksflóttinn úr landinu heldur áfram og margir eiga engan rétt til atvinnuleysisbóta, þannig að atvinnuleysisskráningin gefur ekki einu sinni rétta mynd af raunverulegu atvinnuleysi í landinu og gjaldþrot fyrirtækja hafa aldrei verið fleiri en á þessu ári.

Fjórði vetur frá hruni gefur engar vonir um bættan hag og betri tíð í þjóðfélaginu.

Vel á annað hundrað uppsagnir

Athugasemdir

[Haukur Kristinsson (IP-tala skráð) 30.9.2011 kl. 12:02]

Já, Axel góður. Hélstu að það tæki aðeins 3 ár að koma okkar þjóðfélagi á réttan kjöl, eftir að afglaparnir Dabbi + Dóru keyrðu allt til andskotans. Hér var öllu stolið steini léttara, eins og þú hlýtur að muna, þótt líklega ekki langminnugur.

[Axel Jóhann Axelsson, 30.9.2011 kl. 18:35]

Haukur, þessi athugasemd þín sýnir glögglega að þú ert bæði minnis- og skilningslaus, fyrst þú hvorki mannst eða hefur skilið niðurstöðu Rannsóknarnefndar Alþingis um hverjir það voru sem höfuðábyrgð báru á bankahruninu. Það voru sannarlega hvorki Davíð eða Halldór og er ekki annað hægt en að benda þér á að fá þér gleggri menn til að útskýra rannsóknarniðurstöðuna fyrir þér.