Útsölurnar lækka húsnæðislánin

Útsölur verslana í janúar lækka vísitölu neysluverðs mun meira, en hvað skattahækkanir ríkisstjórnarinnar hífa hana upp.  Þetta mun auðvitað breytast til hins verra, þegar útsölunum lýkur og skattahækkanirnar koma þá af fullum þunga fram í vísitölunni.

Það sem verkur hins vegar athygli, er mikil sveifla á flugfargjöldum milli mánaða, en í desember voru flugfargjöld sögð hafa hækkað um rúm 20%, en í janúar lækka þau aftur um rúmlega 20%.   Hvort jólafargjöldin eru svon miklu dýrari, en önnur fargjöld, kemur ekki fram, en hlýtur að vera skýringin.

Þá vaknar sú spurning, hvort eðlilegt sé, að svona skammtímasveiflur í verlagi, t.d. árstíðabundin flugfargjöld og útsölur, eigi að hafa svona mikil áhrif á vísitölu neysluverðs, sem aftur hefur bein áhrif á húsnæðislán almennings, oftast til hækkunar.

Væri ekki eðlilegra, að miða við meðaltalsverðlag, t.d. síðustu þriggja mánaða, við þessa útreikninga, því það myndi minnka sveiflurnar í vísitölunni og gefa réttari mynd til lengri tíma litið.

Verðbólgan mælist 6,6%

Athugasemdir

[Jón Óskarsson, 26.1.2010 kl. 22:09]

Það er athyglisvert að skoða vel töfluna á vef Hagstofu Íslands og skoða skýringar á vísitölubreytingum:

http://www.hagstofa.is/Pages/95?NewsID=4468 

Þegar grannt er skoðað þá má t.d. sjá að ef lækkunum vegna útsalan er sleppt þá er 12 mánaða verðbólga nálægt 8%.  Eins má sjá að vísitalan eins og hún reiknuð stendur í 10,3% verðbólgu m.v. 12 síðustu mánuði ef húsnæðisþættinum er sleppt.

Útreikningsaðferðir Hagstofunnar eru um margt mjög sérstakar og upplýsingar byggðar á gömlum neyslugrunnum auk þess sem miklar verðsveiflur í fatnaði, flugfargjöldum og öðru slíku eru að valda mjög sérkennilegum áhrifum.  Mér hefur alla tíð þótt mjög sérstakt að tímabundnar stórútsölur eins og í kringum áramót skuli vera teknar inn af jafnmiklum þunga og raun ber vitni.