Borgarstjórinn grættur á íbúafundi

Jón Gnarr, borgarstjóri, ber sig aumlega eftir íbúafund í Grafarvogi og segist hafa orðið fyrir einelti og ofbeldi af hendi fundarmanna.

Svo virðist að eineltið og ofbeldið hafi falist í því að fundarmaður kallaði borgarstjórnarmeirihlutann "hyski", sem hann vildi helst vera laus við úr lífi sínu. Einnig mun hafa komið fram mikil óánægja nokkurra fundarmanna með frammistöðu borgaryfirvalda í málefnum hverfisins.

Allir, sem fylgst hafa með stjórnmálum í langan tíma og sótt ýmsa fundi með stjórnmálamönnum, hafa heyrt og séð ýmislegt verra en það sem þarna sýnist hafa verið á ferðinni og afar óvenjulegt, ef ekki einsdæmi, að stjórnmálamenn væli og skæli undan því sem við þá er sagt á slíkum samkomum.

Þar fyrir utan er orðanotkun borgarstjórans afar undarleg, því óskiljanlegt er hvernig hægt er að kalla þetta, þó afar ókurteislegt sé, "einelti og ofbeldi" og ber vott um mikla "orðtakablindu".

Ruddaleg framkoma á svona fundum er algerlega óafsakanleg en væl og skæl borgarstjórans eftir fundinn bendir ekki til að hann hafi taugar til að sinna opinberu embætti.

„Einelti og hreint og klárt ofbeldi“

Athugasemdir

[Rafn Haraldur Sigurðsson (IP-tala skráð) 30.1.2013 kl. 21:20]

Það má kannski segja ýmislegt um Borgarstjóra, en orðtök og framkoma ræðumanns í hans garðs, þá fannst mér hann vera að lýsa sjálfum sér og íbúum Grafavogs  sem algjöru hyski þó svo ég viti að þar býr innan um ágætis fólk. Að öðru leiti er ég nokkuð sammála þér.

[Axel Jóhann Axelsson, 30.1.2013 kl. 21:22]

Það er áreiðanlega hárrétt hjá þér, að við Grafarvogsbúar séum óttalegt hyski sem borgarstjórinn og meirihlutinn vilja ekkert af vita.

[Rafn Haraldur Sigurðsson (IP-tala skráð) 30.1.2013 kl. 21:25]

Það skyldi aldrei vera?

[Jóhann Kristinsson, 31.1.2013 kl. 01:00]

Þetta sýnir enn og aftur að Jón Gnarr er ekki í réttu starfi, hann ætti að segja af sér borgarstjórastarfinu og fara í gamla trúð starfið sem hann sómaði sér vel í.

Kveðja frá Las Vegas

[Helga Kristjánsdóttir, 31.1.2013 kl. 09:19]

Það má gera grín að stjórnmálamönnum miðað við boðskap myndarinnar Gnarr frá 2010,þar sem borgarfulltrúar eru sagðir leiðinlegir og gert grín að klæðaburði Hönnu Birnu.

[Axel Jóhann Axelsson, 31.1.2013 kl. 12:57]

Það er stutt á milli gráturs og hláturs. Jón Gnarr grætur og landið og miðin skellihlæja.