Verður Umboðsmaður Alþingis settur út í kuldann?

Umboðsmaður Alþingis hefur sent ríkisstjórninni harðorða gagnrýni vegna undarlegra, ómarkvissra og pólitískra aðgerða tengda sölu á hlut ríkisins í Hitaveitu Suðurnesja til Magma Energy á árinu 2010.

Þetta er aðeins eitt af mörgum tilfellum sem ráðherrar ríkisstjórnarinnar verða uppvísir að lélegri stjórnsýslu og í sumum tilfellum lögbrotum, en þar sem brotaviljinn hefur verið afar einbeittur hafa ráðherrarnir einungis orðið hortugri og hortugri eftir því sem brotunum fjölgar.

Hingað til hefur þjónum ríkisins ekki gefist vel að gagnrýna núverandi ráðherra, því slíkt hefur kallað á hörð viðbrögð af hálfu ráðherranna sem í hlut hafa átt, ríkisstjórnarinnar allrar, að ekki sé minnst á Björn Val Gíslason í þessu sambandi, en honum hefur verið beitt í vörninni og skítverkunum og alls ekki leiðst það hlutskipti.

Nýlega lýsti Björn Valur, f.h. ríkisstjórnarinnar, yfir algeru stríði við Ríkisendurskoðanda og mun sjálfsagt ekki láta af þeim hernaði fyrr en hann hefur komið ríkisendurskoðandanum úr starfi og komið þangað þóknanlegri VGliða.

Eftir þessa hörðu ádrepu Umboðsmanns Alþingis má reikna með að hann þurfi að eyða drjúgum tíma á næstunni í að verja sjálfan sig og stofnun sína fyrir ríkisstjórninni og útsendurum hennar.

Blanda saman stjórnsýslu og pólitík

Athugasemdir

[Magnús Óskar Ingvarsson, 1.11.2012 kl. 15:41]

"Hingað til hefur þjónum ríkisins ekki gefist vel að gagnrýna núverandi ráðherra, því slíkt hefur kallað á hörð viðbrögð af hálfu ráðherranna sem í hlut hafa átt, ríkisstjórnarinnar allrar, að ekki sé minnst á Björn Val Gíslason í þessu sambandi, en honum hefur verið beitt í vörninni og skítverkunum og alls ekki leiðst það hlutskipti."

Þetta er alveg satt og rétt. Að þessu leyti eru núverandi stjórnvöld alveg eins og þau hafi útskrifast úr stjórsýsluskóla  Davíðs Oddssonar. Það eina sem vantar núna er snarlega að leggja niður Ríkisendurskoðun og Umboðsmann Alþingis. Burt með alla óþæga ljái í þúfu(m).