Björgunarsveitirnar þurfa aðstoð

Þegar snjó kyngir niður á höfuðborgarsvæðinu, jafnvel þó ekki sé í sama mæli og í nótt, eru björgunarsveitirnar alltaf til taks til að aðstoða ökumenn sem sitja fastir á bílum sínum vítt og breitt um bæinn.

Allan ársins hring eru félagar sveitanna í viðbragðsstöðu, hvort sem er til að bjarga ferðamönnum í villum, fólki í lífsháska til sjós og lands og ekki síður innanbæja hringinn í kringum landið, hvenær sem aðstoðar er þörf.

Útgerð björgunarsveitanna kostar mikla fjármuni og við fjáröflun til starfseminnar treysta sveitirnar að stórum hluta á flugeldasöluna í kringum áramótin og því mikið í húfi að almenningur beini viðskiptum sínum til þeirra og sýni þannig þakklæti sitt fyrir óeigingjarnt starf þeirra.

Ástæða er til að minna fólk á að beina flugeldaviðskiptum sínum til hjálparsveitanna um þessi áramót, eins og önnur, en kaupa ekki skoteldana frá einkaaðilum, sem eingöngu reyna að maka krókinn, en leggja ekkert af mörkum á móti í þágu almennings.

Björgunarsveitirnar þarfnast stuðnings til að geta veitt almenningi stuðning.

Þungfært vegna fannfergis

Athugasemdir

[Sigurður Haraldsson, 29.12.2011 kl. 10:52]

Takk samlandi góður við stöndum saman.

[Eyrún Inga Maríusdóttir, 29.12.2011 kl. 13:06]

Ég kaupi alltaf jólatré og flugelda hjá Björgunnarsveitinni :)

[Magnús Óskar Ingvarsson, 29.12.2011 kl. 15:13]

Góð brýning hjá þér Axel. Ég tek eindregið undir með þér að fólk ætti alveg skilyrðislaust að versla flugeldana hjá björgunarsveitum Landsbjargar og/eða Hjálparsveitum skáta og Flugbjörgunarsveitinni. Þetta fólk er boðið og búið til aðstoðar og björgunar hvenær sem er í sjálfboðaliðsstarfi og verður að fá fjármagn til að standa undir rekstri dýrra tækja og búnaðar.