Tamdi sér lífsstíl útrásarvíkinga

Micahael Carrol, sorphirðumaður, vann stóra pottinn í breska lottóinu fyrir átta árum, en potturinn nam um tveim milljörðum króna.  Hann er nú kominn á atvinnuleysisbætur, því hann sólundaði öllum peningunum í lúxus, íbúðir, veislur, skartgripi, gjafir til góðgerðarfélaga og ættingja og í gleðikonur.

Þessi skjótfengni gróði, virkaði á Michael á nákvæmlega sama hátt og nýrýka íslenska banka- og útrásarskúrka, en þeir kepptu hver við annan í gjálífinu, með kaupum á lúxusíbúðum, snekkjum, flugvélum, þyrlum og bílum.  Þeir héldu dýrustu veislur, sem um getur og voru örlátir á styrki til góðgerðar- og menningarmála og ýmsar sögur fara af svalli og gleði í veiðiferðum þeirra í dýrustu laxveiðiám landsins.

Þó er einn meginmunur á Michael og sukkkollegum hans íslenskum, þ.e. hann sukkaði fyrir sína eigin peninga, en banka- og útrásarskúrkarnir fyrir lánsfé, sem þeir ætluðu sér aldrei að borga til baka, enda hafa þeir ekki gert það og lánadrottnar þeirra sitja eftir með þúsundir milljarða sárt enni.

Annar munur er sá, að Michael er kominn á atvinnuleysisbætur, en íslensku skúrkunum er haldið uppi af þjóðinni og nýju bönkunum og þeir halda flestum sínum eignum, eins og ekkert hafi í skorist.

Þetta er sem sagt dæmisaga um það, að það er miklu farsælla að sukka fyrir annarra manna fé, en sitt eigið.

Vann tvo milljarða í lottói en er kominn aftur á bætur

Athugasemdir

[Sigurbjörg Eiríksdóttir, 9.2.2010 kl. 08:34]

Magnað. En að mörgu leyti líkt. Íslensku óráðssíumennirnir eru bara á ofurbótum með fríu húsnæði.

[Jón Snæbjörnsson, 9.2.2010 kl. 09:37]

þessir aurar fóru allavegana hratt út í hagkerfið sem er gott

[Axel Jóhann Axelsson, 9.2.2010 kl. 09:57]

Jón, þeir fóru aðallega út í hagkerfi erlendra ríkja, þar sem fjárfestingarnar voru nánast allar erlendis.  Þess vegna voru þeir kallaðir útrásarvíkingnar. 

Þeir héldu meira að segja stærstu partýin erlendis, væntanlega til þess að halda íslenskum aðdáendum sínum í hæfilegri fjarlægð.

[Jón Snæbjörnsson, 9.2.2010 kl. 13:08]

ég átti nú við þennann "heppna" í UK hann skilaði þessu inn í sitt hagkerfi með ýmsum hætti

þessir íslensku eru nú sér á báti og bara baggi á þjóðinni áður sem nú

[Axel Jóhann Axelsson, 9.2.2010 kl. 13:20]

Jón, það er alveg rétt hjá þér, að sá breski hefur eflt hagvöxtinn þar í landi verulega, á meðan að á veislunni stóð.

[jón (IP-tala skráð) 10.2.2010 kl. 11:30]

Hann kom hingað til náms í skóla sjálfstæðisflokksins, og var þar undir handleiðslu Davíðs Oddsonar, Kjartans Gunnarssonar og Björgólfs Guðmundssonar.